تبلیغات
اورمودان گلن سسلر - اورارتولارین قالاسی

اورارتولارین قالاسی

تاریخ:سه شنبه 20 تیر 1391-01:17 ق.ظ

اورارتولارین اؤز دورلرینده علمی جهتدن نه قدر گوجلو اولدوقلاری هامی تاریخچیلره بللی دیر. اورارتولار اؤز دورلرینین ان انكشاف ائتمیش دولتلریندن بیری اولوبلار. مختلف ساحه لره نظر سالساق، اونلارین سو تكنولوژیلری داها گؤزه چارپیر. بو ساحه ده چالیشیقلاری هله ده سو علملری اوزره متخصصلری و اوزمانلاری تعجبه و حیرته سالیر. اورارتولار بیرینجی دفعه دونیادا كهریز چكیبلر، گؤیدن یاغان یاغیشلاری سو آنبارلارینا یئرلشدیریبلر، سو ذخیره سینه گؤره چایلار اوسته ایشله ییبلر و ان اؤنملی سی باراندوز چایینین سویونو یوكسلیكلره و داغین اتكلرینه چكیبلر. بو ایشی نئجه گؤروبلر هله لیك معلوم اولمایان بیر شئی دیر، نیه كی باراندوز چاییندا ایشلتدیكلری فیزیك قانونونو 18-جی میلادی عصرده كشف اولونوب و آوروپادا بو قانوندان 200 ایل اولار فایدالانیرلار. باراندوز چاییندا ایشله نن علم بودور:

باراندوز چایینین سویونو یوكسكلیكلره و اورارتولارین قالاسی یئرلشدیگی یئره، اكینچیلیك اوچون چكیبلر. دئمك اولار اونلارین چكدیگی سو كانالی چایین اصلی یئریندن بعضی یئرلرده بلكه ده 300 متر اوجالیقدا یئرلشیر. همن خاطرلاتدیغیمیز بو قالا، بیر یوكسكلیكده یئرلشیر. بو قالادا اورارتو و ماد شاهلارینین مزارلاریدا یئرلشیر. آما مزارلارین اؤزلرینی داغیدیب، آپاریبلار. بو مزارلار اوچروم اولان بیر یئرده یئرلشیب و هره سی بیر ایچی بوش اوتاق كیمی دیر.  بو قالادا مختلف ساخسی قابلاری تورپاق آلتدان چیخیر و قاچاقچیلار اونون هر یئرینی قازیق-قازیق ائدیب، بیزه میراث قالان اثرلری قارا بازارلاردا ساتیشا چیخاریرلار. قالانین اوزو دولودور ساخسی سینیقلاری ایله. بو قالادا همده قوربانلیق مراسملری كئچیریلیرمیش. قالانین بیر طرفی سرت قایالار ایله اوجا بیر اوچرومدور، اورارتولار اؤزلرینی بورادان یئره آتاراق، اؤز آللاهلاری خالدی یه قوربان ائدیرمیشلر.

ائله بو عامللره گؤره گئدیب، بورادان شكیل چكیب، سیزلره تانیتماق اوچون بلوقوما یئرلشدیردیم.